【為何飛機餐總是難食】
正所謂出外國玩，切記貪飛機餐。所以我每次出國，必定預早少少時間醫肚，然後上機直接大覺訓。我咁做，除咗唔想有人擾我清夢，最主要係飛機餐真係難啃。話時話，點解咁多人都會覺得飛機餐難食呢？
一餐飯要稱得上為好味，唔單只講緊放入口食物嘅味道，仲講緊成個食嘢嘅體驗，例如餐廳裝修成點、有無清幽香味、環境嘈唔嘈、張凳舒唔舒服、侍應態度好唔好，每樣因素都影響對餐飯嘅評分。所以話，消費者食嘢係會食埋環境，一啲都無誇張到。哈佛商學院教授Clayton Christensen曾經講過，消費者購買一種產品或者服務，可以理解成「僱用」嗰種產品同服務，從而希望獲得快樂。如果對體驗感到滿意，先會考慮再次「僱用」。而決定消費者係咪滿意，除咗50%關當下體驗事之外，對上一次體驗同回憶都有50%影響力。
咁就可以解釋到，點解咁多人(包括我)都認為飛機餐係屬於難食。一來喺高空之下，味蕾敏感度會下降3成，空氣又乾燥，嗅覺無法正常作用，自然覺得味道麻麻；第二，享用飛機餐時，座位唔舒服，周圍環境又嘈，導致體驗同回憶都差。當兩者加埋，就只係得一個總結–飛機餐總是難食！
我講咁多，除咗想話俾大家知，滿足消費者要顧及產品同服務質素，成個消費體驗都好重要。另外就係，風水輪流轉，以前就一直嫌棄飛機餐，今時今日，有得食難食飛機餐，都係一件幸福事。究竟我哋幾時先可以出國玩呢？！
Search